छावा हा चित्रपट करमुक्त करा. संभाजी ब्रिगेडची मुख्यमंत्र्याकडे मागणी
सोलापूर – मराठा सम्राट छत्रपती संभाजी महाराज यांच्या जीवनावर आधारित आगामी भारतीय हिंदी भाषेतील ऐतिहासिक चित्रपट छवा हा येत्या 14 फेब्रुवारी 2025 रोजी सर्व चित्रपटगृहांमध्ये प्रदर्शित होणार आहे या चित्रपटाची उत्सुकता अनेकांना लागलेली असून छत्रपती संभाजी महाराज यांच्या जाज्वल्य जीवन चरित्रावरील हा चित्रपट महाराष्ट्रातील जनतेला पाहण्यासाठी कर मुक्त करावा अशी मागणी संभाजी ब्रिगेडच्या वतीने संभाजी ब्रिगेडची पश्चिम महाराष्ट्र अध्यक्ष शाम कदम यांनी मुख्यमंत्री देवेंद्र फडणवीस यांच्याकडे ई-मेल द्वारे केली आहे.
शिवपुत्र ‘संभाजी महाराज एक छावाच होते महाराष्ट्राला हे नव्याने; पण पुरेपूर उमजले आहे. ‘छावा’ चा ट्रेलर चे जोरदार स्वागताने ते सिद्धही झाले आहे. एकदोन नव्हे; तर एकाचवेळी पाच आघाड्यांवर निकराची पंजेफाड करणारा हा सेनाधुरंधर! मराठ्यांच्या इतिहासात असा सेनापती एकमेव ‘संभाजी’च होऊन गेला. जंजिरेकर सिद्दी, गोव्याचे फिरंगी, मुंबईचे टोपीकर आणि तीस लाखांची फौज व चौदा कोटींचा खजिना घेऊन मराठ्यांचे पारिपत्य करण्यासाठी दक्षिणेत उतरलेला अवाढव्य औरंगजेब – या त्या चार आघाड्या. पाचवी आघाडी होती, स्वार्थांध स्वजनांची, अगदी घरचीच! विखारी विश्वास घातक्यांची! रणांगणाचा वाघ सतत नऊ वर्षे पाठीशी घेत मुलूखभर दौडणारा हा झुंजार राजा जन्माला येताना कविमनाचे संचित बरोबर घेऊन यावा आणि ‘बुधभूषणम्’ काव्याची रचना करून तो कविराज म्हणून मान्यता पावावा; हे पाहिले की, प्रतिभा देवदत्त असली; तरी एक अजब आणि विस्मयकारी देणगी आहे, असे म्हणावे लागते. तसाच अटीतटीचा प्रसंग आला तर मराठी कविमन एकदा का निर्धाराने राजवस्त्र ल्याले की, मृत्यूलाही कसे धडक सामोरे जाऊ शकते; हे या छाव्याने तुळापुरी सिद्ध केले. ही शोकांतिका तर खरीच; पण उत्कट आणि भव्य समर्पणाचा वेध घेणारा चित्रपट आहे.
त्यामुळे महाराष्ट्र शासनाने तमाम हिंदू व शिवशंभु प्रेमींच्या भावनेची दखल घेऊन हा चित्रपट त्वरित करमुक्त करावा जेणेकरून छत्रपती संभाजी महाराजांचा जन्म इतिहास या चित्रपटातून लोकांना कळणार आहे
